COSTALNEWS BIG BREAKING | CRIME NEWS ಗಂಗೊಳ್ಳಿ: ಮಗುವಾದ ಬಳಿಕ ಪತ್ನಿಯಿಂದ ದೂರವಾದ ಪತಿ; ಸಂಧಾನ ಸಭೆಯಲ್ಲೂ ಅವಮಾನ ಆರೋಪ — ಮನನೊಂದು ಫಿನೈಲ್ ಸೇವಿಸಿದ ನವವಿವಾಹಿತೆ!
Wednesday, October 14, 2026
ಮಗುವಾದ ಬಳಿಕ ಪತ್ನಿಯಿಂದ ದೂರ ಉಳಿದ ಪತಿ, ಸಂಸಾರ ಮುಂದುವರಿಸುವ ವಿಚಾರವಾಗಿ ನಡೆದ ಸಂಧಾನ ಸಭೆಯಲ್ಲೂ ಅವಮಾನಕರವಾಗಿ ಮಾತನಾಡಿದ್ದಾರೆ ಎನ್ನಲಾದ ಆರೋಪ ಕೇಳಿಬಂದಿದೆ. ಇದರಿಂದ ಮನನೊಂದ ಮಹಿಳೆಯೊಬ್ಬರು ತವರು ಮನೆಯಲ್ಲಿ ಫಿನೈಲ್ ಸೇವಿಸಿ ಅಸ್ವಸ್ಥಗೊಂಡಿದ್ದು, ಕುಂದಾಪುರದ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಸಂಬಂಧ ಪತಿ ಸೇರಿದಂತೆ ಆರೋಪಿಗಳ ವಿರುದ್ಧ ಗಂಗೊಳ್ಳಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಆಲೂರು ಗ್ರಾಮದ ಕಳಿಯ ನಿವಾಸಿ ಚಂದ್ರಯ್ಯ ಆಚಾರ್ಯ ಅವರ ಪುತ್ರಿ ಜಯಶ್ರೀ ಅವರು 2024ರ ನವೆಂಬರ್ 17ರಂದು ದೇವಲ್ಕುಂದದ ಸಾಗರ್ ಪ್ಯಾಲೇಸ್ ಹಾಲ್‌ನಲ್ಲಿ ಪ್ರಕಾಶ್ ಆಚಾರ್ಯ ಅವರನ್ನು ಹಿಂದೂ ಸಂಪ್ರದಾಯದಂತೆ ವಿವಾಹವಾಗಿದ್ದರು. ಮದುವೆಯ ಬಳಿಕ ಅಮಾಸೆಬೈಲಿನ ತಪ್ಲು ಎಂಬಲ್ಲಿರುವ ಪತಿಯ ಮನೆಗೆ ತೆರಳಿದ್ದರು.
ಮಗುವಾದರೆ ನೋಡಿಕೊಳ್ಳುವುದಿಲ್ಲವೆಂದು ಕಿರುಕುಳದ ಆರೋಪ!
ಜಯಶ್ರೀ ಅವರ ದೂರಿನ ಪ್ರಕಾರ, ಪತಿಯ ಅಣ್ಣ ಪ್ರಭಾಕರ ಹಾಗೂ ತಂಗಿ ಪ್ರಶಾಂತಿ ಅವರು ಮಕ್ಕಳಾದರೆ ಪ್ರಕಾಶ್ ತಮ್ಮನ್ನು ಮತ್ತು ತಮ್ಮ ಮಕ್ಕಳನ್ನು ನೋಡಿಕೊಳ್ಳುವುದಿಲ್ಲ ಎಂದು ಪದೇಪದೇ ಹೇಳಿ ಕಿರುಕುಳ ನೀಡುತ್ತಿದ್ದರು ಎನ್ನಲಾಗಿದೆ. ಅಲ್ಲದೆ, ತವರು ಮನೆಗೆ ಕರೆ ಮಾಡುವಾಗ ಮೊಬೈಲ್ ಕಸಿದುಕೊಂಡು ಪರಿಶೀಲಿಸುವುದು ಹಾಗೂ ಬೆದರಿಕೆ ಹಾಕಿದ ಆರೋಪವೂ ದೂರಿನಲ್ಲಿ ಉಲ್ಲೇಖವಾಗಿದೆ.
2025ರ ಡಿಸೆಂಬರ್‌ನಲ್ಲಿ ಜಯಶ್ರೀ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಇದಾದ ಬಳಿಕ ಕಳೆದ ಆರು ತಿಂಗಳಿಂದ ಪತಿ ಪ್ರಕಾಶ್ ಅವರು ತಮ್ಮನ್ನು ಭೇಟಿಯಾಗದೆ ದೂರ ಉಳಿದಿದ್ದರು ಎಂದು ಜಯಶ್ರೀ ಆರೋಪಿಸಿದ್ದಾರೆ.
2026ರ ಅಕ್ಟೋಬರ್ 11ರಂದು ಉಭಯ ಕುಟುಂಬದವರು ಸೇರಿ ದಂಪತಿಯ ಸಂಸಾರ ಮುಂದುವರಿಸುವ ವಿಚಾರವಾಗಿ ಮಾತುಕತೆ ನಡೆಸಿದ್ದರು. ಈ ಸಂದರ್ಭದಲ್ಲಿ ಪ್ರಕಾಶ್ ಅವರು ಸಂಸಾರ ನಡೆಸಲು ನಿರಾಕರಿಸಿದ್ದಲ್ಲದೆ, ಜಯಶ್ರೀ ಮತ್ತು ಮಗುವಿನ ಕುರಿತು ಅವಮಾನಕರ ಮಾತುಗಳನ್ನಾಡಿ ಮಾನಸಿಕ ಹಿಂಸೆ ನೀಡಿದ್ದಾರೆ ಎಂದು ದೂರಿನಲ್ಲಿ ಆರೋಪಿಸಲಾಗಿದೆ.
ಈ ಘಟನೆಯಿಂದ ತೀವ್ರವಾಗಿ ಮನನೊಂದ ಜಯಶ್ರೀ ಅವರು ಅಂದೇ ಆಲೂರಿನ ಕಳಿಯಲ್ಲಿರುವ ತಮ್ಮ ತವರು ಮನೆಯಲ್ಲಿ ಫಿನೈಲ್ ಸೇವಿಸಿ ಅಸ್ವಸ್ಥಗೊಂಡಿದ್ದಾರೆ ಎನ್ನಲಾಗಿದೆ. ತಕ್ಷಣ ಅವರನ್ನು ಕುಂದಾಪುರದ ಶ್ರೀ ಸಾಯಿ ಆಸ್ಪತ್ರೆಗೆ ದಾಖಲಿಸಲಾಗಿದ್ದು, ಒಳರೋಗಿಯಾಗಿ ಚಿಕಿತ್ಸೆ ನೀಡಲಾಗುತ್ತಿದೆ.
ಈ ಘಟನೆಗೆ ಸಂಬಂಧಿಸಿದಂತೆ ಗಂಗೊಳ್ಳಿ ಪೊಲೀಸ್ ಠಾಣೆಯಲ್ಲಿ ಅಪರಾಧ ಕ್ರಮಾಂಕ 47/2026ರ ಅಡಿಯಲ್ಲಿ ಭಾರತೀಯ ನ್ಯಾಯ ಸಂಹಿತೆಯ ಕಲಂ 85, 352, 351 ಹಾಗೂ 3(5)ರಂತೆ ಪ್ರಕರಣ ದಾಖಲಾಗಿದೆ. ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.