Kundapura: ಮೆಸ್ಕಾಂ ವಿದ್ಯುತ್ ಕಂಬಗಳ ಮೇಲೆ ಕಾನೂನು ಬಾಹಿರವಾಗಿ ಕೇಬಲ್ ರಾಶಿ, ಜಂಕ್ಷನ್ ಬಾಕ್ಸ್, wifi ಜಂಕ್ಷನ್ ಬಾಕ್ಸ್, amplifier ತೆರವುಗೊಳಿಸಲು ಅಂತಿಮ ನೋಟಿಸ್

ಕುಂದಾಪುರ: ತಾಲೂಕಿನಾದ್ಯಂತ ಮೆಸ್ಕಾಂ ವಿದ್ಯುತ್ ಕಂಬಗಳನ್ನು ಬಳಸಿಕೊಂಡು ಅನಧಿಕೃತವಾಗಿ ಅಳವಡಿಸಲಾಗಿರುವ ಕೇಬಲ್ ರಾಶಿ ಹಾಗೂ ಕಾನೂನು ಬಾಹಿರವಾಗಿ ಜಂಕ್ಷನ್ ಬಾಕ್ಸ್, wifi ಜಂಕ್ಷನ್ ಬಾಕ್ಸ್, amplifier ತೆರವುಗೊಳಿಸುವಂತೆ ಮೆಸ್ಕಾಂ ಇಲಾಖೆಯು ಸಂಬಂಧಪಟ್ಟ ಕೇಬಲ್ ಆಪರೇಟರ್‌ಗಳಿಗೆ ಕಟ್ಟುನಿಟ್ಟಿನ ನೋಟಿಸ್ ಜಾರಿ ಮಾಡಿದೆ.

ಸಮಸ್ಯೆಯ ಹಿನ್ನೆಲೆ:

ವಿದ್ಯುತ್ ಕಂಬಗಳ ಮೇಲೆ ನಿಯಮಬಾಹಿರವಾಗಿ ಟಿವಿ ಕೇಬಲ್ ರಾಶಿ, ವೈಫೈ ಕೇಬಲ್ ಹಾಗೂ ಜಂಕ್ಷನ್ ಬಾಕ್ಸ್‌ಗಳನ್ನು ಅಳವಡಿಸುತ್ತಿರುವುದು ಸಾರ್ವಜನಿಕ ದೂರಿನಿಂದ ಮೆಸ್ಕಾಂ ಗಮನಕ್ಕೆ ಬಂದಿದೆ. ನಿಯಮಾನುಸಾರ ಕೇವಲ ಕೇಬಲ್ ಮಾತ್ರ ಹಾದು ಹೋಗಲು ಅನುಮತಿ ಇರುವುದಾಗಿದೆ. ಅದರಲ್ಲೂ ಕುಂದಾಪುರ ಪುರಸಭೆ ವ್ಯಾಪ್ತಿಯಲ್ಲಿ ಅಧಿಕಾರಿಗಳ ಎದುರುಗಡೆ ಮುಲಾಜಿಿಲ್ಲದೆ ಇಂತಹ ಮಹಾನ್ ಕಾರ್ಯ ಗೋಚರಿಸುತ್ತದೆ ಹಾಗೂ  ಕುಂದಾಪುರ ಬೈಂದೂರು ಭಾಗದಲ್ಲಿ ಅವೈಜ್ಞಾನಿಕವಾಗಿ ಕೇಬಲ್‌ಗಳನ್ನು ಕಂಬಗಳಿಗೆ ಸುತ್ತುವುದರಿಂದ ಮತ್ತು ದೊಡ್ಡ ಗಾತ್ರದ ಬಾಕ್ಸ್‌ಗಳನ್ನು ಅಳವಡಿಸುವುದರಿಂದ ಸಾರ್ವಜನಿಕರಿಗೆ ಅಪಾಯವಾಗುವ ಸಾಧ್ಯತೆಯಿದೆ. ಅಲ್ಲದೆ, ತುರ್ತು ಸಂದರ್ಭಗಳಲ್ಲಿ ಮೆಸ್ಕಾಂ ಸಿಬ್ಬಂದಿ ಕಂಬ ಏರಿ ಕೆಲಸ ನಿರ್ವಹಿಸಲು ಇದು ಅಡ್ಡಿಯಾಗುತ್ತಿದೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.

ವರದಿಯ ಮುಖ್ಯಾಂಶಗಳು:

ಅವೈಜ್ಞಾನಿಕ ಅಳವಡಿಕೆ: ಕೇಬಲ್‌ಗಳನ್ನು ಕಂಬಗಳಿಗೆ ಎಲ್ಲೆಂದರಲ್ಲಿ ಸುತ್ತಿರುವುದು ಮತ್ತು ಭಾರೀ ಗಾತ್ರದ ಅಪ್ಲಿಫೈಯರ್ ಬಾಕ್ಸ್‌ಗಳನ್ನು ಹಾಕಿರುವುದು ಮೆಸ್ಕಾಂ ನಿಯಮಗಳ ಉಲ್ಲಂಘನೆಯಾಗಿದೆ.

ಗಡುವು: ಈ ಹಿಂದೆ ನೀಡಿದ ಸೂಚನೆಯನ್ನು ಪಾಲಿಸದ ಹಿನ್ನೆಲೆಯಲ್ಲಿ, ಪ್ರಸ್ತುತ ಈ ನೋಟಿಸ್ ತಲುಪಿದ ಒಂದು ವಾರದ ಒಳಗಾಗಿ ಎಲ್ಲಾ ಅನಧಿಕೃತ ಕೇಬಲ್‌ಗಳನ್ನು ಆಪರೇಟರ್‌ಗಳೇ ಸ್ವತಃ ತೆರವುಗೊಳಿಸಬೇಕು.

ಕಠಿಣ ಕ್ರಮ: ಒಂದು ವೇಳೆ ನಿಗದಿತ ಅವಧಿಯೊಳಗೆ ಕೇಬಲ್ ತೆರವುಗೊಳಿಸದಿದ್ದರೆ, ಮೆಸ್ಕಾಂ ವತಿಯಿಂದಲೇ ಅವುಗಳನ್ನು ಕತ್ತರಿಸಿ ತೆರವುಗೊಳಿಸಲಾಗುವುದು. ಈ ಸಂದರ್ಭದಲ್ಲಿ ಆಗುವ ನಷ್ಟಕ್ಕೆ ಸಂಬಂಧಪಟ್ಟ ಸಂಸ್ಥೆ ಅಥವಾ ಆಪರೇಟರ್‌ಗಳೇ ನೇರ ಹೊಣೆಗಾರರಾಗಿರುತ್ತಾರೆ ಎಂದು ಮೆಸ್ಕಾಂ ಸಹಾಯಕ ಕಾರ್ಯನಿರ್ವಾಹಕ ಎಂಜಿನಿಯರ್ ಅವರು ಎಚ್ಚರಿಕೆ ನೀಡಿದ್ದಾರೆ.

ಈ ಕ್ರಮವು ವಿದ್ಯುತ್ ಸುರಕ್ಷತೆ ಮತ್ತು ಸಾರ್ವಜನಿಕ ಹಿತದೃಷ್ಟಿಯಿಂದ ಅನಿವಾರ್ಯವಾಗಿದ್ದು, ಸಂಬಂಧಪಟ್ಟವರು ಕೂಡಲೇ ಸ್ಪಂದಿಸಬೇಕೆಂದು ಇಲಾಖೆ ಕೋರಿದೆ.